தூத்துக்குடி சட்டமன்றத் தொகுதியில் முன்னாள் அமைச்சர் கீதா ஜீவனை எதிர்த்து த.வெ.க சார்பில் போட்டியிட்டு வெற்றி பெற்றார் நடிகர் ஸ்ரீநாத். தமிழக மீன்வளத்துறை அமைச்சராகவும் பொறுப்பேற்றுள்ளார். கடந்த மே, 30-ம் தேதி திருச்செந்தூர் சுப்பிரமணிய சுவாமி திருக்கோயிலுக்கு சுவாமி தரிசனம் செய்வதற்காக வருகை தந்தார் ஸ்ரீநாத். பின்னர், திருச்செந்தூர் அருகிலுள்ள அமலிநகர், மணப்பாடு, வீரபாண்டியன்பட்டிணம், ஆலந்தலை உள்ளிட்ட பகுதிகளில் மக்கள் சந்திப்பு நடத்தினார். தொடர்ந்து திருச்செந்தூர் சட்டமன்றத் தொகுதிக்குட்பட்ட ஆத்தூர் அருகிலுள்ள புன்னக்காயல் பகுதிக்குச் சென்றார்.
திறந்த வேனில் நின்று, “எல்லாருக்கும் வணக்கம், வணக்கம், வணக்கம். புன்னக்காயல் மக்களே ஐ லவ் யூ. ஐ லவ் யூ. உங்களோட அன்புக்கும் ஆதரவுக்கும் ரொம்ப நன்றி. அதிக வாக்குகள் வித்யாசத்தில் என்னை ஜெயிக்க வச்ச உங்களுக்கும், நம்ம மக்களுக்கும் ரொம்ப நன்றி.” எனப் பேசினார். ”இது திருச்செந்தூர் தொகுதி அமைச்சரே” எனக் கூட்டத்தில் ஒருவர் உரக்கச் சொல்ல… மைக்கினை அருகில் உள்ள த.வெ.க நிர்வாகி ஒருவரிடம் கொடுத்துவிட்டு சிரித்தபடியே கையசைத்து அங்கிருந்து கிளம்பிச் சென்றார்.
தனது சொந்த தொகுதி எது? தொகுதிக்குட்பட்ட எல்லைகள் எது? எந்தெந்த ஊர்கள் தொகுதிக்குள் வரும் என்பதுகூட தெரியாமல் அமைச்சர் இருக்கிறாரே என எதிர்கட்சியினர் விமர்சனம் செய்துள்ளனர். அத்துடன் ஸ்ரீநாத் தொகுதி மாறி நன்றி தெரிவித்த வீடியோவும் சமூக வலைதளங்களில் வைரலாகி வருகிறது. இது குறித்து அதிமுக ஐ.டி விங்க் வெளியிட்ட எக்ஸ் பதிவில், ‘தூத்துக்குடி தொகுதியில் வெற்றி பெற்ற மீன்வளத் துறை அமைச்சர் ஸ்ரீநாத், தான் வெற்றி பெற்ற தொகுதி எது என்பதைக்கூட அறியாமல், திராவிட முன்னேற்றக் கழகத்தைச் சேர்ந்த மற்றொருவர் வெற்றி பெற்ற திருச்செந்தூர் தொகுதியின் ஒரு பகுதியான புன்னக்காயலுக்குச் சென்று தனக்கு வாக்களித்ததற்கு நன்றி தெரிவித்து வருகிறார்.
தனது தொகுதி எல்லை எது என்றுகூடத் தெரியாத அளவிற்கு அரசியல் முதிர்ச்சியற்றவர்கள் அமைச்சர்களாக இருப்பது தமிழகத்தின் சாபக்கேடு’ எனக் குறிப்பிடப்பட்டிருக்கிறது.
