தேர்தல் முடிவுகள் அதிகாரப்பூர்வமாக அறிவிக்கப்படுவதற்கு சில நாள்களுக்கு முன்பே, நாடு முழுவதும் “யாருக்கு வெற்றி வாய்ப்பு?” போன்ற அனல் பறக்கும் விவாதங்கள் தொடங்கிவிடும். இந்த விவாதங்களுக்கு முதன்மையானதும், மக்களின் எதிர்பார்ப்பை பூர்த்தி செய்வதுமாக இருப்பதுதான் ‘எக்சிட் போல்’ (Exit Poll).
இது வெறுமனே யூகத்தின் அடிப்படையில் சொல்லப்படும் ஒன்றல்ல. மாறாக, இது ஒரு விஞ்ஞானபூர்வமான, புள்ளிவிவர அடிப்படையிலான ஆய்வு. இந்தியாவில் 1957-ம் ஆண்டு நடைபெற்ற இரண்டாவது மக்களவைத் தேர்தலின்போது, ‘இந்திய பொதுக்கருத்து நிறுவனம்’ (Indian Institute of Public Opinion) முதல்முறையாக எக்சிட் போலை நடத்தியது. அன்று முதல் இன்று வரை, இது தேர்தல் ஆய்வுகளின் மிக முக்கிய கருவியாக வளர்ந்து நிற்கிறது.
எக்சிட் போலை சரியாகப் புரிந்துகொள்ள, மற்ற கருத்துக்கணிப்புகளிலிருந்து அது எப்படி வேறுபடுகிறது என்பதைத் தெரிந்துகொள்வது அவசியம். பொதுவாக மூன்று முக்கிய வகைகள் உள்ளன:
தேர்தலுக்கு முந்தைய கருத்துக்கணிப்பு (Pre-Poll Survey): தேர்தல் தேதி அறிவிக்கப்பட்டதிலிருந்து, வாக்குப்பதிவுக்கு சில வாரங்கள் அல்லது மாதங்களுக்கு முன்பு வரை நடத்தப்படும். “நீங்கள் யாருக்கு வாக்களிக்க விரும்புகிறீர்கள்?” என்பதே இதன் மையக் கேள்வி.
வாக்களித்த பின் கருத்துக்கணிப்பு (Exit Poll): வாக்குப்பதிவு நாளன்று, வாக்குச்சாவடியிலிருந்து வாக்களித்துவிட்டு வெளியே வரும் வாக்காளர்களிடம் நேரடியாக, நடத்தப்படும் ஆய்வு இது. வாக்களித்த உடனேயே கேட்கப்படுவதால், இதன் முடிவுகள் மிகவும் துல்லியமாக இருக்க வாய்ப்புள்ளது.
தேர்தலுக்குப் பிந்தைய கருத்துக்கணிப்பு (Post-Poll Survey): வாக்குப்பதிவு முடிந்த ஓரிரு நாட்களில், மக்களின் வீடுகளுக்குச் சென்றோ அல்லது தொலைபேசி மூலமாகவோ இந்த ஆய்வு நடத்தப்படும்.
ஒரு எக்சிட் போல் என்பது ஏதோ சிலரிடம் கருத்து கேட்பது மட்டுமல்ல. அதன் பின்னால் ஒரு விரிவான செயல்முறை உள்ளது. அதன் முக்கிய நிலைகள்…
> தொகுதிகளைத் தேர்ந்தெடுத்தல்
ஒரு நாட்டின் அல்லது ஒரு மாநிலத்தின் ஒட்டுமொத்த பிரதிபலிப்பை ஒரு சிறிய மாதிரியில் கொண்டுவருவதே இதன் முதல் சவால். இதற்காக, `சீரற்ற மாதிரி தேர்வு’ (Stratified Random Sampling) முறை பயன்படுத்தப்படுகிறது. இதன் மூலம், நகரம் மற்றும் கிராமப்புற விகிதம், சாதி மற்றும் மதப் பிரதிநிதித்துவம், கடந்த தேர்தல் வரலாறு மற்றும் புவியியல் பரவல் (வடக்கு, தெற்கு, கிழக்கு, மேற்கு) என அனைத்து அம்சங்களையும் உள்ளடக்கிய தொகுதிகள் கவனமாகத் தேர்ந்தெடுக்கப்படுகின்றன.
> வாக்குச்சாவடிகளைத் தேர்ந்தெடுத்தல்
தேர்ந்தெடுக்கப்பட்ட ஒவ்வொரு தொகுதிக்குள்ளும், குறிப்பிட்ட வாக்குச்சாவடிகளை ‘முறைசார் சீரற்ற மாதிரி தேர்வு’ (Systematic Random Sampling) மூலம் தேர்வு செய்வார்கள். இதிலும் கிராமம்/நகரம், சாதி அமைப்பு, கடந்த வாக்குப்பதிவு சதவீதம் போன்ற அளவுகோல்கள் கருத்தில் கொள்ளப்படும்.
> வாக்காளர்களை அணுகுதல்
வாக்குச்சாவடியிலிருந்து வெளியேறும் ஒவ்வொருவரையும் ஆய்வாளர்கள் அணுகுவதில்லை. ஒருதலைபட்சமான முடிவுகளைத் தவிர்க்க, வெளியேறும் ஒவ்வொரு மூன்றாவது அல்லது ஐந்தாவது வாக்காளரை மட்டும் (k-th person method) அணுகுவார்கள். இதன் மூலம், ஒரு குறிப்பிட்ட குழுவாக வருபவர்களின் கருத்துக்கள் ஒட்டுமொத்த முடிவைப் பாதிக்காமல் தடுக்கப்படுகிறது.
> தரவு சேகரிப்பு மற்றும் பகுப்பாய்வு
வாக்காளரிடம், “யாருக்கு வாக்களித்தீர்கள்?”, “ஏன் வாக்களித்தீர்கள்?” என்பன போன்ற கேள்விகள் கேட்கப்படும். வாக்காளரின் பெயர் போன்ற தனிப்பட்ட அடையாளங்கள் எதுவும் சேகரிக்கப்படாது. இன்று, இந்தத் தரவுகள் அனைத்தும் டிஜிட்டல் செயலிகள் மூலம் உடனடியாக மத்திய சேவையகத்திற்கு அனுப்பப்படுகின்றன.
கள ஆய்வாளர் சரியான இடத்தில் இருக்கிறாரா என்பதை உறுதிப்படுத்த ‘Geo-location’ தொழில்நுட்பமும் உதவுகிறது. சேகரிக்கப்பட்ட தரவுகள், ‘Weighting’ (மாதிரியில் உள்ள ஏற்றத்தாழ்வுகளை சரிசெய்தல்), ‘Swing Analysis’ (கடந்த தேர்தலுடன் ஒப்பிட்டு வாக்கு மாற்றத்தைக் கணக்கிடுதல்) போன்ற புள்ளிவிவர முறைகளைப் பயன்படுத்தி பகுப்பாய்வு செய்யப்பட்டு, வாக்கு சதவீதம் இடங்களாக (Seats) கணிக்கப்படுகிறது.
இந்தியாவில் எக்சிட் போல்கள் சந்திக்கும் சவால்கள்
இந்தியா போன்ற பெரிய, பரந்த பன்முகத்தன்மை கொண்ட நாட்டில் எக்சிட் போல் நடத்துவது எளிதான காரியமல்ல. பல சவால்கள் இதன் துல்லியத்தன்மையை பாதிக்கின்றன.
Shy Voter Effect: சில வாக்காளர்கள், தாங்கள் யாருக்கு வாக்களித்தோம் என்பதை வெளிப்படையாகச் சொல்லத் தயங்குவார்கள். இது முடிவுகளில் தாக்கத்தை ஏற்படுத்தலாம்.
பல கட்டத் தேர்தல்: இந்தியாவில் தேர்தல் பல கட்டங்களாக நடைபெறுவதால், முதல் கட்ட எக்சிட் போல் முடிவுகள் அடுத்த கட்ட வாக்காளர்களின் மனநிலையை பாதிக்கக்கூடும். இதனால்தான், கடைசி கட்ட வாக்குப்பதிவு முடியும் வரை எக்சிட் போல் முடிவுகளை வெளியிட தேர்தல் ஆணையம் தடை விதித்துள்ளது.
மாதிரித் தேர்வில் பிழை (Sampling Error): ஆய்வுக்குத் தேர்ந்தெடுக்கப்படும் மாதிரி, மக்களின் உண்மையான பிரதிபலிப்பாக இல்லையென்றால், முடிவுகள் தவறாகப் போக அதிக வாய்ப்புள்ளது. பல எக்சிட் போல்கள் தவறுவதற்கு இதுவே முக்கியக் காரணம்.
எக்சிட் போல் என்பது தேர்தல் முடிவுகளின் ஒரு முன்னோட்டம் மட்டுமே. சரியான வழிமுறைகள், நேர்மையான தரவு சேகரிப்பு மற்றும் போதுமான மாதிரி அளவுடன் நடத்தப்படும்போது, அது உண்மையான முடிவுகளுக்கு மிக நெருக்கமாக வரக்கூடும். அது வெறும் யூகமல்ல, மாறாக ஜனநாயகத்தின் மிகப்பெரிய திருவிழாவைப் புரிந்துகொள்ள உதவும் ஒரு சாத்தியமான விஞ்ஞானபூர்வமான முயற்சி என்பதே அரசியல் பார்வையாளர்களின் கருத்தாக உள்ளது.
