கோவை மாவட்டத்தில் மொத்தம் 10 சட்டமன்றத் தொகுதிகள் உள்ளன. இத்தொகுதிகளின் வாக்கு எண்ணிக்கை கோவை தடாகம் சாலையில் உள்ள அரசினர் தொழில்நுட்பக் கல்லூரியில் இன்று காலை 8 மணி முதல் நடைபெற்று வருகிறது. இதில் த.வெ.க. வேட்பாளர்கள் அதிக தொகுதிகளில் முன்னிலை வகித்து வருகின்றனர்.
2 மணி நிலவரப்படி கிணத்துக்கடவு, சூலூர், கோவை வடக்கு, சிங்காநல்லூர், கவுண்டம்பாளையம் ஆகிய 5 தொகுதிகளில் த.வெ.க., தொடர்ந்து முன்னிலை வகித்து வருகிறது. தி.மு.க வேட்பாளர்கள் கோவை தெற்கு, மேட்டுப்பாளையம், வால்பாறை ஆகிய 3 தொகுதிகளில் முன்னிலையில் உள்ளனர். அ.தி.மு.க., வேட்பாளர்கள் தொண்டாமுத்தூர், பொள்ளாச்சி ஆகிய 2 தொகுதிகளில் முன்னிலையில் உள்ளனர்.
தி.மு.க-வில் கோவை தெற்கில் செந்தில் பாலாஜி, மேட்டுப்பாளையத்தில் கவிதா கல்யாணசுந்தரம், வால்பாறையில் சுதாகர் ஆகியோர் தொடர்ந்து முன்னிலையில் உள்ளனர். அ.தி.மு.க-வில் தொண்டாமுத்தூரில் எஸ்.பி.வேலுமணி, பொள்ளாச்சியில் பொள்ளாச்சி ஜெயராமன் ஆகியோர் தொடர்ந்து முன்னிலை பெற்று வருகின்றனர்.
த.வெ.க-வில் கிணத்துக்கடவில் விக்னேஷ், கோவை வடக்கில் சம்பத்குமார், சூலூரில் சுகுமார், கவுண்டம்பாளையத்தில் கனிமொழி சந்தோஷ், சிங்காநல்லூரில் ஸ்ரீ கிரி பிரசாத் ஆகியோர் முன்னிலையில் உள்ளனர். கோவை வடக்கு தொகுதியில் பின்னடைவைச் சந்தித்து வரும் பா.ஜ.க வேட்பாளர் வானதி சீனிவாசன், தொடர்ந்து மூன்றாவது இடத்திலேயே நீடிக்கிறார்.
