"வனவிலங்குகள், தெருநாய்கள், பூனைகளை பிடித்து ஆய்வக சோதனைகள்.!"- மத்திய அரசுக்கு தயாநிதி மாறன் கடிதம்

மத்திய அரசு புதிய விலங்குகள் வதை தடுப்புச் சட்டத்தை அறிமுகப்ப்படுத்தியுள்ளது.

இந்தச் சட்டத்தை மறு ஆய்வு செய்ய வேண்டும் என்று மீன்வளம், கால்நடை பராமரிப்பு மற்றும் பால்வளத்துறையின் மத்திய அமைச்சர் ராஜீவ் ரஞ்சன் (லலன்) சிங்கிற்கு கடிதம் எழுதியுள்ளார் நாடாளுமன்ற உறுப்பினர் தயாநிதி மாறன்.

“பெரிய விலங்குகள் தொடர்பான பரிசோதனைகள் உள்ளிட்ட பரிசோதனைகளுக்கு நிறுவனங்களின் நெறிமுறைக் குழுக்களே ஒப்புதல் அளிக்க அனுமதிக்கும் வகையில் முன்மொழியப்பட்டுள்ள மாற்றம்,

பொறுப்புக்கூறல் மற்றும் சுதந்திரமான ஆய்வின் போதுமான தன்மை குறித்து முக்கியமான கேள்விகளை எழுப்புகிறது.

வனவிலங்குகள், தெரு நாய்கள் மற்றும் பூனைகளைப் பிடித்து ஆய்வகப் பரிசோதனைகளுக்குப் பயன்படுத்த வழிவகுக்கும் விலக்குகள் குறித்தும் கவலைகள் எழுகின்றன.

அழகுசாதனப் பொருள்கள் சோதனை, மருத்துவக் கல்வி மற்றும் சில மருந்துப் பரிசோதனை முறைகளில், விலங்குகளைப் பயன்படுத்தாத மாற்று வழிகளை அங்கீகரிப்பதில் இந்தியா ஏற்கெனவே முன்னேற்றம் கண்டுள்ளது.

மனித உயிரணுக்கள் சார்ந்த ஆராய்ச்சி, மனித உறுப்புகளின் செயல்பாடுகளை கணினி சிப் வடிவில் உள்ளமைக்கும் அதிநவீன மருத்துவத் தொழில்நுட்பமான ‘ஆர்கன்-ஆன்-சிப்’ (organ-on-chip) தொழில்நுட்பங்கள்,

மனித திசு மாதிரிகள் மற்றும் கணினி வழி மாதிரியாக்க முறைகள் (computational methods) போன்றவை, விலங்குகளைப் பயன்படுத்தும் சோதனைகளைக் குறைத்து, அறிவியல் முன்னேற்றத்தை ஊக்குவிக்க சிறந்த வாய்ப்புகளை வழங்குகின்றன.

1. எவரையும் சார்ந்திராத விலங்கு நல நிபுணர்கள், விஞ்ஞானிகள், கால்நடை மருத்துவர்கள், ஆராய்ச்சி நிறுவனங்கள் மற்றும் சமூக அமைப்புகளுடன் கலந்தாலோசித்து, விரிவான மறுஆய்வை மேற்கொள்ள வேண்டும்.

2. விலங்குகள் மீதான பரிசோதனைகளைக் கட்டுப்படுத்துதல் மற்றும் `கண்காணிப்பு குழு’ (CCSEA) மூலம் மேற்கொள்ளப்படும் வலுவான சுதந்திரமான மேற்பார்வையை, தொடர்ந்து நடைமுறையில் வைத்திருக்க வேண்டும்.

3. வனவிலங்குகள் மற்றும் மனிதர்களோடு இணைந்து வாழும் விலங்குகளைப் பிடிப்பதற்கோ அல்லது ஆய்வகச் சோதனைகளில் பயன்படுத்துவதற்கோ வழிவகுக்கும் தெளிவற்ற விலக்குகளை நீக்குவதன் மூலமும்,

எந்தவொரு விதிவிலக்குகளும் துல்லியமாக வரையறுக்கப்பட்டு, சட்டப்பூர்வமாக நியாயப்படுத்தப்பட்டு, கடுமையான ஆய்வுக்கு உட்படுத்தப்படுவதை உறுதி செய்வதன் மூலமும், அவற்றுக்கான பாதுகாப்புகளை வலுப்படுத்த வேண்டும்.

4. பொருத்தமான மயக்க மருந்து மற்றும் வலி நிவாரணம், மனிதாபிமான நிலைகள், பொருந்தக்கூடிய இடங்களில் மறுவாழ்வுத் தேவைகள் மற்றும் வசதிகளின் கண்காணிப்பு மற்றும் முன்னறிவிப்பில்லாத உள்ளிட்ட,

திறமையான அமல்படுத்தக்கூடிய இறுதி ஆராய்ச்சி ஆய்வுகள் விலங்கு நலத் தரநிலைகளைப் பாதுகாக்க வேண்டும்.

5. அறிவியல் ரீதியாக உறுதிப்படுத்தப்பட்ட விலங்குகள் அல்லாத ஆராய்ச்சி முறைகளின் வளர்ச்சி மற்றும் பயன்பாட்டை ஊக்குவிக்க, இதற்கெனத் தனிப்பட்ட நிதி ஒதுக்கீடு,

நிறுவனக் கட்டமைப்பு வசதிகள் மற்றும் அறிவியல் ரீதியாகச் சாத்தியமான இடங்களில் விலங்குகள் மீதான பரிசோதனைகளைக் குறைத்து, படிப்படியாக மாற்று முறைகளால் அவற்றை முழுமையாக மாற்றுவதற்கான தெளிவான தேசியத் திட்டம் ஆகியவற்றை உருவாக்க வேண்டும்.”

Source link