இந்திய அரசியலின் தற்போதைய மிக உற்றுநோக்கப்படும் ‘ஹாட் டாபிக்’ எதுவென்றால், அது மேற்கு வங்க மாநிலத்தில் அரங்கேறி வரும் அதிரடி அரசியல் திருப்பங்கள்தான் என்பதில் எவ்வித சந்தேகமும் இருக்க முடியாது.
அண்மையில் நடந்து முடிந்த சட்டமன்றத் தேர்தல் தோல்விக்குப் பிறகு, அம்மாநில ஆளுங்கட்சியான அகில இந்திய திரிணாமுல் காங்கிரஸ் கட்சியில் யாரும் எதிர்பார்க்காத ஒரு மாபெரும் உள்கட்சிப் பிளவு வெடித்துள்ளது. தங்கள் ரத்தமும் சதையுமா வளர்த்து எடுத்த கட்சியின் சுப்ரீம் லீடர் மம்தா பானர்ஜிக்கு எதிராகவே, அவரது சொந்தக் கட்சியைச் சேர்ந்த 50-க்கும் மேற்பட்ட எம்.எல்.ஏ-க்கள் தற்போது பகிரங்கமாகப் போர்க்கொடி தூக்கியுள்ளனர்.
யாராலும் அசைக்க முடியாது என்று கருதப்பட்ட ‘வங்காளப் புலி’ மம்தாவுக்கே இந்த நிலைமையா என்று இந்திய அரசியல் வட்டாரமே வியப்பில் உறைந்துள்ளது.
மக்களால் அன்போடு ‘தீதி’ (Didi – அக்கா) என்று அழைக்கப்படும் மம்தா பானர்ஜியின் அரசியல் பயணம் எப்படிப்பட்டது? கம்யூனிஸ்டுகளை வீழ்த்த அவர் திரிணாமுல் காங்கிரஸை எவ்வாறு தொடங்கினார்? அவரது சாதனைகள் என்ன? தற்போது வெடித்துள்ள உள்கட்சிப் பூசலின் பின்னணியில் உள்ள பா.ஜ.க-வின் வியூகம் மற்றும் ‘இந்தியா’ கூட்டணிக்கு ஏற்படப்போகும் தாக்கம் என்ன? என்பது குறித்து இங்கு விரிவாக அலசுவோம்.
எளிய பின்னணியில் இருந்து நாடாளுமன்றம் வரை
மம்தா பானர்ஜி எவ்வித பெரிய அரசியல் பின்னணியும் கொண்ட குடும்பத்தில் இருந்து வந்தவர் அல்ல. ஒரு சாதாரண நடுத்தர வர்க்கக் குடும்பத்தில் பிறந்து, தனது அசாத்திய உழைப்பாலும் அஞ்சாத போராட்ட குணத்தாலும் இந்த உயரத்தை அடைந்தவர். 1970-களில் ஒரு சாதாரண காங்கிரஸ் தொண்டராகத் தனது அரசியல் வாழ்க்கையைத் தொடங்கிய மம்தாவிடம் இருந்த ஆக்ரோஷமான பேச்சு, அஞ்சாத குணம் மற்றும் மக்களைத் திரட்டும் வேகம் ஆகியவை அவரை மிக விரைவாக முன்னணிக்குக் கொண்டு வந்தன.
இதன் உச்சகட்டமாக, 1984 நாடாளுமன்றத் தேர்தலில், இடதுசாரிகளின் அசைக்க முடியாத தூணாக விளங்கிய சோம்நாத் சட்டர்ஜியையே தோற்கடித்து, தனது 29-வது வயதில் இளம் நாடாளுமன்ற உறுப்பினராக நுழைந்து இந்திய அரசியலையே அதிர வைத்தார்.
மத்திய அமைச்சராக, குறிப்பாக ரயில்வே அமைச்சராக மம்தா கொண்டு வந்த திட்டங்கள் மக்கள் மத்தியில் பெரும் வரவேற்பைப் பெற்றன. எனினும், மேற்கு வங்கத்தில் 34 ஆண்டுகளாக நீடித்து வந்த கம்யூனிஸ்டுகளின் ஆட்சிக் கோட்டையைத் தகர்ப்பதே அவரது ஒற்றை இலக்காக இருந்தது. இடதுசாரிகளுக்கு எதிராக டெல்லி காங்கிரஸ் தலைமை மென்மையான போக்கைக் கடைப்பிடிப்பதாகக் கருதிய மம்தா, 1998 ஜனவரி 1-ஆம் தேதி காங்கிரஸில் இருந்து பிரிந்து ‘அகில இந்திய திரிணாமுல் காங்கிரஸ்’ கட்சியைத் தொடங்கினார்.
‘திரிணாமுல்’ என்றால் ‘புல்வெளி’ அல்லது ‘வேர்கள்’ என்று அர்த்தம். அதாவது, அடிமட்ட மக்களிடமிருந்து உருவான கட்சி என்பதை அது குறித்தது.
நந்திகிராம் போராட்டமும் 34 வருட இடதுசாரி வீழ்ச்சியும்
கட்சி தொடங்கிய பின் மம்தா சும்மா இருக்கவில்லை. சிங்கூர் மற்றும் நந்திகிராம் ஆகிய இடங்களில் விவசாயிகளின் நிலங்களைத் தொழிற்சாலைகளுக்காக அரசு கையகப்படுத்த முயன்றபோது, விவசாயிகளுக்காக களமிறங்கி 26 நாட்கள் தொடர் உண்ணாவிரதப் போராட்டம் நடத்தினார். இந்த வரலாற்றுச் சிறப்புமிக்க போராட்டம் ஒட்டுமொத்த மேற்கு வங்க மக்களின் கவனத்தையும் அவர் பக்கம் திருப்பியது.
இதன் விளைவாக, 2011 சட்டமன்றத் தேர்தலில் 34 வருட கம்யூனிஸ்ட் ஆட்சியை வேரோடு பிடுங்கி எறிந்துவிட்டு, மன்மதா பானர்ஜி முதன்முறையாக முதலமைச்சர் அரியணையில் அமர்ந்து சரித்திரம் படைத்தார். பெண்களைக் கவர்ந்த ‘ஒன் வுமன் ஆர்மி’யின் மக்கள் நலத்திட்டங்கள்முதலமைச்சரான பிறகு ஏழை எளிய மக்கள் மற்றும் பெண்களைக் கவரும் வகையில் பல அதிரடி மக்கள் நலத்திட்டங்களை மம்தா செயல்படுத்தினார்
லக்ஷ்மி பந்தர் : தமிழ்நாட்டின் மகளிர் உரிமைத்தொகைத் திட்டம் போல, குடும்பத் தலைவிகளுக்கு மாதாந்திர உதவித்தொகை வழங்கி பெண்களின் பொருளாதார சுதந்திரத்தை உறுதி செய்யும் திட்டம்.
கன்யாஸ்ரீ பிரகல்பா : பெண் குழந்தைகளின் கல்வி மேம்பாடு மற்றும் குழந்தை திருமணத் தடுப்பிற்கான இந்த சூப்பர் ஹிட் திட்டத்திற்காக ஐக்கிய நாடுகள் சபையின் (UN) உயரிய விருதே மம்தாவுக்குக் கிடைத்தது.
சுவஸ்திய : ஏழை எளிய மக்களுக்கான மருத்துவக் காப்பீட்டுத் திட்டம். இத்தகைய திட்டங்களாலும், கிராமப்புற சாலை மேம்பாடு போன்ற உள்கட்டமைப்புகளாலும் மேற்கு வங்கத்தின் ‘ஒன் வுமன் ஆர்மி’யாக வலம் வந்த மம்தா, 2016 மற்றும் 2021 ஆகிய தேர்தல்களிலும் பா.ஜ.க-வின் அசுர வேக சவால்களை முறியடித்து, தொடர்ச்சியாக 3 முறை முதலமைச்சராக நீடித்து சாதனை படைத்தார்.
அசைக்க முடியாத சக்தியாக இருந்த திரிணாமுல் காங்கிரஸில் தற்போது ஏற்பட்டுள்ள பிளவுக்கு, அண்மையில் நடந்த சட்டமன்றத் தேர்தலில் கட்சி சந்தித்த எதிர்பாராத பெரும் தோல்வியே பிரதான காரணமாகும். இந்தத் தோல்வி கட்சிக்குள் நீண்ட நாட்களாகப் புகைந்து கொண்டிருந்த அதிருப்தியை எரிமலையாக வெடிக்கச் செய்துள்ளது.
கட்சிக்குள் எழுந்துள்ள முக்கியக் குற்றச்சாட்டுகள்:
தன்னிச்சையான போக்கு: மன்மதா பானர்ஜி கட்சியைத் தனிநபராக, தன்னிச்சையாக நடத்துகிறார் என்றும், மூத்த தலைவர்களுக்கு உரிய மதிப்பு தருவதில்லை என்றும் குற்றம் சாட்டப்படுகிறது.
வாரிசு அரசியல் அதிருப்தி: மம்தாவின் மருமகன் அபிஷேக் பானர்ஜிக்குக் கட்சியில் அதீத முக்கியத்துவம் கொடுக்கப்படுவது, ரத்தம் சிந்தி கட்சியை வளர்த்த சீனியர் தலைவர்கள் மற்றும் எம்.எல்.ஏ-க்களுக்கு கடும் அதிருப்தியை ஏற்படுத்தியுள்ளது.
தங்கள் உழைப்பில் உருவான கட்சி ஒரு குறிப்பிட்ட குடும்பத்தின் கைக்குள் போவதாகக் கூறி, 50-க்கும் மேற்பட்ட எம்.எல்.ஏ-க்கள் மம்தாவின் தலைமைக்கு எதிராகப் பகிரங்கமாகப் போர்க்கொடி தூக்கியுள்ளதால் கட்சி தற்போது இரண்டாக உடையும் விளிம்பில் நிற்கிறது.
பிராந்தியக் கட்சிகளை வலுவிழக்கச் செய்யும் பா.ஜ.க-வின் உத்திகளுக்குள் திரிணாமுல் காங்கிரஸ் சிக்கியுள்ளதாகவே அரசியல் விமர்சகர்கள் ஆணித்தரமாகக் குறிப்பிடுகின்றனர். மகாராஷ்டிராவில் சிவசேனா மற்றும் என்.சி.பி ஆகிய கட்சிகளுக்குள் நிலவிய வாரிசு அரசியல் மற்றும் உள்கட்சிப் பூசல்களைப் பயன்படுத்தி கட்சிகளை உடைத்த அதே ஃபார்முலாவைத்தான் பா.ஜ.க தற்போது மேற்கு வங்கத்திலும் கையில் எடுத்துள்ளதாகக் கூறப்படுகிறது.
அதிருப்தி எம்.எல்.ஏ-க்களுக்குப் பின்னால் பா.ஜ.க-வின் மறைமுக ஆதரவு இருப்பதாகப் பேசப்படும் நிலையில், தேர்தல் தோல்வியால் துவண்டு போயிருக்கும் டிஎம்சி-யை இந்த உள்கட்சிப் பூசல் மூலமே மொத்தமாகக் காலி செய்துவிட்டு, அடுத்த முறை ஆட்சியைப் பிடிப்பதற்கான கச்சிதமான ‘ஸ்கெட்ச்’ போட்டு பா.ஜ.க வேலை செய்து வருகிறது.
ஒருவேளை அதிருப்தி எம்.எல்.ஏ-க்கள் மம்தாவின் தலைமையை முழுமையாகப் புறக்கணித்தால், அது தேசிய அரசியலில் இரண்டு முக்கியப் பாதிப்புகளை ஏற்படுத்தும்
திரிணாமுல் காங்கிரஸ் என்ற கட்சியின் ஒட்டுமொத்த பிராண்ட் மதிப்பே மம்தா பானர்ஜி மட்டும்தான். அவர் ஓரங்கட்டப்பட்டால் அந்த கட்சி சிதறிப்போய் தன் முகவரியை இழக்கும். தேசிய அளவில் பா.ஜ.க-வை மிக ஆக்ரோஷமாக எதிர்க்கும் முக்கிய ஆளுமைகளில் மம்தாவும் ஒருவர். மேற்கு வங்கத்தில் அவருக்கு ஏற்படும் பின்னடைவு, ‘இந்தியா’ கூட்டணியின் ஒட்டுமொத்த பலத்தைக் குறைப்பதோடு, நாடாளுமன்றத்தில் எதிர்க்கட்சிகளின் குரலை ஒடுக்க பா.ஜ.க-விற்கு மேலும் சாதகமாக அமைந்துவிடும்.
போராட்டங்களாலேயே தனது அரசியல் பேரரசை உருவாக்கிய மம்தா பானர்ஜிக்கு, தற்போது அவரது சொந்தக் கட்சிக்காரர்களே கொடுத்துள்ள இந்த நெருக்கடி, அவரது அரசியல் வாழ்வின் மிகக் கடுமையான சோதனைக் காலகட்டமாகும். இந்த இக்கட்டான சூழ்நிலையைத் தன் அரசியல் சாணக்கியத்தனத்தால் ‘வங்காளப் புலி’ மம்தா முறியடிப்பாரா, அல்லது பா.ஜ.க-வின் உத்திகளுக்குப் பலியாகப் போகிறாரா என்பதைப் பொறுத்திருந்துதான் பார்க்க வேண்டும்.!
