சிறப்புத் தீவிரத் திருத்தத்தில் நடைபெற்றுள்ள குளறுபடிகளை எதிர்த்தும், தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்று கோரியும் டெல்லி ஜந்தர் மந்தரில் மாணவர்கள் போராட்டம் நடத்தி வருகின்றனர்.
இந்தப் போராட்டத்தை ஒடுக்க டெல்லி போலீசார் சாலைகளை மறிப்பது, மாணவர்களைக் கைது செய்வது, மெட்ரோ உள்ளிட்ட போக்குவரத்தை நிறுத்துவது போன்றவற்றைச் செய்து வருகின்றனர்.
இதை எதிர்த்து உச்ச நீதிமன்றத்தில் வழக்கு தொடரப்பட்டது.
இந்த வழக்கை இன்று (அக்டோபர் 11) நீதிபதிகள் ஜாய்மால்யா பாக்சி மற்றும் வி. மோகனா விசாரித்தனர்.
தீர்ப்பு
விசாரணையின் முடிவில் நீதிபதிகள், “சட்டத்திற்கு உட்பட்டு நகரில் மக்கள் தடையின்றி நடமாட அனுமதிக்கப்பட வேண்டும். குறிப்பாக, பாரதிய நாகரிக் சுரக்ஷா சன்ஹிதா (BNSS) பிரிவு 163 அமலில் உள்ள பகுதிகளைத் தாண்டி, அமைதியான வழியில் ஆயுதங்களின்றி ஒன்றுகூடியிருக்கும் மக்களைச் சட்டவிரோதமாகக் காவலில் வைக்கக் கூடாது.
உச்ச நீதிமன்றம் மற்றும் அதன் சுற்றுவட்டாரப் பகுதிகளில் பிரிவு 163-ன் கீழ் தடை உத்தரவு பிறப்பிக்கப்பட்டுள்ளதாகத் தெரிவிக்கப்பட்டுள்ளது.
உச்ச நீதிமன்றத்திற்குள் நுழைவதிலும் வெளியேறுவதிலும் நீதி பெறுவதற்கான உரிமை பாதிக்கப்படும் என்ற அச்சம் எழாத வகையில், அந்தத் தடைகளை உடனடியாக விலக்கிக்கொள்ள வேண்டும் என்று அதிகாரிகளுக்கு உத்தரவிடுகிறோம்.
இணையச் சேவை…
போக்குவரத்து விதிமுறைகளுக்கு உட்பட்டு நகரில் மக்கள் தடையின்றி நடமாட அனுமதிக்கப்பட வேண்டும். சட்ட ஒழுங்கைக் கருத்தில் கொண்டு, தடுப்புகள் அமைப்பதற்கான தேவைகள் குறித்து மறுபரிசீலனை செய்யப்பட வேண்டும்.
இணையச் சேவைகள் எவ்விதத் தடையுமின்றித் தொடர்ந்து செயல்பட வேண்டும்” என்று தீர்ப்பளித்துள்ளனர்.
