அமெரிக்க நாடாளுமன்றத்தில் தற்போது ஜனநாயகக் கட்சியின் கை மேலோங்கியுள்ளது.
2024-ம் ஆண்டு அமெரிக்க அதிபராக ட்ரம்ப் இரண்டாவது முறையாகப் பதவியேற்றபோது, காங்கிரஸில் குடியரசுக் கட்சிதான் பெரும்பான்மையாக இருந்தது.
குடியரசுக் கட்சி, ஜனநாயகக் கட்சி என்று குழப்பமாக இருக்கிறதா? குடியரசுக் கட்சி என்பது ட்ரம்ப் கட்சி. ஜனநாயகக் கட்சி அவரது கட்சியின் எதிர்க்கட்சி.
அமெரிக்க நாடாளுமன்றம்
அமெரிக்க நாடாளுமன்றத்தில் கீழ்சபை, மேல்சபை என இரு சபைகள் உள்ளன.
கீழ்சபை பிரதிநிதிகளின் சபை ஆகும். இதில் மொத்தம் 435 இடங்கள். பெரும்பான்மை பெற 218 இடங்களில் வெற்றி பெற வேண்டும்.
மேல்சபை செனட் ஆகும். இதில் மொத்தம் 100 இடங்கள். இதில் பெரும்பான்மை பெற 51 இடங்கள் வேண்டும். மேல்சபை, கீழ்சபை இரண்டிலுமே ஜனநாயகக் கட்சிதான் லீடில் உள்ளது. வாக்கு எண்ணிக்கையில் மேல்சபையில் 51 இடங்களைத் தாண்டி ஜனநாயகக் கட்சி முன்னிலையில் இருக்கிறது.
ட்ரம்ப் மீது என்ன அதிருப்தி?
Make America Great Again என்று ஆட்சியைப் பிடித்தவர்தான் ட்ரம்ப். எல்லாமே அமெரிக்காவிற்காகத்தான் செய்து வருகிறேன் என்று தொடர்ந்து முழங்கி வருகிறார்.
பின்பு ஏன் ட்ரம்ப் கட்சிக்கு இந்தச் சறுக்கல் என்று பார்த்தால், அவர் மீது இருக்கும் அதிருப்தியையே இந்தத் தேர்தல் முடிவுகள் காட்டுகின்றன. அமெரிக்காவில் சட்டத்திற்குப் புறம்பாகக் குடியேறியவர்களை வெளியேற்றுவதில் எல்லாம் அமெரிக்க மக்கள் ஹேப்பி.
ஆனால், பரஸ்பர வரி மற்றும் ஈரான் போர் விஷயத்தில்தான் அமெரிக்க மக்களுக்கு நெருடல். அமெரிக்காவிடம் அதிக வரி வசூலிக்கிறார்கள் என்றுதான் பிற நாடுகள் மீது வரிகளைப் போட்டுத் தள்ளினார் ட்ரம்ப்.
பிற நாடுகளின் மீது வரிகளை இறக்கியபோது, அந்தச் சுமை அமெரிக்க மக்களின் தோள்களிலும்தான் இறங்கியது.
அடுத்ததாக, ஈரானால் அமெரிக்காவிற்கு எந்த நேரடிப் பாதிப்பும் இல்லை. ஆனால், இஸ்ரேலுக்கு ஆதரவாக ஈரான் மீது போரைத் தொடங்கினார் ட்ரம்ப்.
இதனால், உலக நாடுகளில் எப்படி எண்ணெய் விலை ஏறியதோ, அதற்கு அமெரிக்காவும் விதிவிலக்கல்ல. மேலும், அமெரிக்காவின் ஆயுதக் கிடங்கிலும் ஆயுதங்கள் கணிசமாகக் குறைந்தன. இதை அமெரிக்க மக்கள் விரும்பவில்லை.
ஈரான் போரினால் பணவீக்கம் அதிகரித்து, அமெரிக்காவின் மத்திய வங்கி ஃபெடரல் ரிசர்வ் வங்கி வட்டி விகிதத்தை ஏற்றியுள்ளது. இதுவும் அமெரிக்க மக்களுக்கு அதிருப்தி.
ட்ரம்பைத் தடுக்க முடியுமா?
முன்னரே சொன்னதுபோல, இதுவரை நாடாளுமன்றத்தில் எந்த மசோதா, சட்டம் இயற்றப்பட்டாலும், பெரும்பான்மையோடு நிறைவேறி வந்தது. இப்போது இதற்கு செக் வைக்கப்பட்டுள்ளது.
ட்ரம்ப் ஏதேனும் சட்டம் கொண்டுவந்தாலும், அதை எதிர்த்து காங்கிரஸ் வாக்களிக்க முடியும். இருந்தாலும், காங்கிரஸ் மசோதாவை எதிர்த்தாலும், அதை அதிபரால் (ட்ரம்ப்) வீட்டோ செய்ய முடியும்.
இதைத் தனது ட்ரூத் சமூக வலைதளப் பக்கத்திலேயே மறைமுகமாகத் தெரிவித்திருக்கிறார் ட்ரம்ப். ஈரான் போருக்கு எதிராகத்தான் ஜனநாயகக் கட்சி இருக்கிறது.
இந்தத் தேர்தலுக்குப் பின், இதற்கு எதிரான தீர்மானத்தைக் கொண்டுவர நிச்சயம் ஜனநாயகக் கட்சி முயலும்.
அதை ட்ரம்ப் வீட்டோ செய்வாரா அல்லது ஏற்றுக்கொள்வாரா என்பதைப் பார்க்கலாம்.
