2026 சட்டமன்றத் தேர்தல் வியூகங்கள், கூட்டணி கணக்குகளைத் திட்டமிட்டு மத்திய பாஜக தமிழ்நாட்டு அரசியலில் காய்களை நகர்த்தத் தொடங்கியிருக்கிறது.
இதில் அதிமுக கூட்டணி பேச்சுவார்த்தைகள் அடிபட அண்ணாமலை பதவி குறித்த பேச்சும் எழுந்தது. பின்னர் மாநில தலைவருக்கான தேர்தல் அறிவிப்பு வெளியானது.
இதில் நயினார் நாகேந்திரன் மட்டுமே விருப்ப மனு அளித்தார். இதையடுத்து நயினார் நாகேந்திரன் ஒரு மனதாகப் போட்டிகளின்றி பாஜக மாநிலத் தலைவராகத் தேர்ந்தெடுக்கப்படவுள்ளார்.
புதிய தலைவரை அதிகாரப்பூர்வமாக அறிவிக்கும் நிகழ்ச்சியும், தேசிய பொதுக்குழு உறுப்பினர்களைத் தேர்வு செய்யும் நிகழ்ச்சியும் இன்று மாலை 5 மணியளவில் வானகரம் ஸ்ரீவாரு மண்டபத்தில் நடைபெற்று வருகிறது.
இதில் தமிழக பாஜகவின் புதிய மாநிலத் தலைவராகப் பதவியேற்றார் நயினார் நாகேந்திரன்.
பாஜகவின் மாநிலத் தலைவராக நயினார் நாகேந்திரன் பதவியேற்ற பிறகுப் பேசியிருக்கும் அண்ணாமலை, “ஐந்து முறை சட்டமன்றத் தேர்தலில் போட்டியிட்டு மூன்று முறை வெற்றி பெற்று, ஒரு முறை அமைச்சரவையில் அமைச்சராகப் பணியாற்றியவர் நயினார் நாகேந்திரன்.
இரண்டு முறை பாராளுமன்றத் தேர்தலிலும் போட்டியிட்டவர். இப்படி அரசியலில் நீண்ட நெடிய அனுபவமிக்கவர். எல்லாராலும் பண்ணையார் என்று அன்போடு அழைக்கப்படும் நயினார் நாகேந்திரன் அவர்கள்.
அவருடன் இணைந்து அனைவரும் பணியாற்றுவோம். 2026 தேர்தலில் தேசிய ஜனநாயகக் கூட்டணி வெற்றியைச் சாத்தியப்படுத்துவோம்.
தமிழகத்திற்கு நேற்று மத்திய உள்துறை அமைச்சர் அமித்ஷா வந்தபோது, தேசிய ஜனநாயகக் கூட்டணி இன்னும் பலமாகியுள்ளது. நிச்சயமாக வெற்றி பெறுவோம் என்கிற நம்பிக்கையை விதைத்திருக்கிறது.
புதிய மாநிலத் தலைவராகப் பொறுப்பேற்று 2026 சட்டப்பேரவைத் தேர்தலின் வெற்றியை நோக்கி பணியாற்றும் நயினார் நாகேந்திரன் அவர்களின் பின்னால் நாம் அனைவரும் ஒரே அணியாக அணிவகுத்து நின்று, அவரின் வழிகாட்டுதலில் தேசிய ஜனநாயகக் கூட்டணியை வெற்றிபெற வைக்கப் பாடுபடுவோம் என்று உறுதி ஏற்போம்.
உங்களை வழிநடத்த எனக்கு நான்கு ஆண்டுகள் அனுமதி கொடுத்ததற்கு எனது தனிப்பட்ட நன்றியைத் தெரிவித்துக் கொள்கிறேன். நன்றி வணக்கம்.” என்று பேசியிருக்கிறார்.
Junior Vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும்… https://bit.ly/47zomWY
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://bit.ly/47zomWY
